ສະມາຄົມການເງິນຈຸລະພາກ (ສມກຈ) ຮ່ວມກັບພາກສ່ວນກ່ຽວຂ້ອງໄດ້ດໍາເນີນການສໍາມະນາທາງໄກຜ່ານ Zoom ໂດຍການໃຫ້ກຽດເຂົ້າຮ່ວມຂອງທ່ານ ສົມພອນ ສີແສງລັດ ປະທານສະພາບໍລິຫານ ສມກຈ, ທ່ານ ນາງ ປະມວນ ເພັດທານີ ຜູ້ອໍານວຍການ ສກມຈ ແລະມີທ່ານ ນາງ Anjali Patel ອົງການແຮງງານສາກົນ (ILO) ຊຶ່ງດໍາເນີນໃນວັນທີ 9 ທັນວາ 2021 ໂດຍມີຜູ້ຕາງໜ້າຈາກກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ ແລະບັນດາຜູ້ປະກອບການຈຸລະວິສາຫະກິດ, ວິສາຫະກິດຂະໜາດນອ້ຍ ແລະກາງ (MSMEs) ໃນທົ່ວປະເທດເຂົ້າຮ່ວມ 131 ຄົນ.
ທ່ານຜູ້ອໍານວຍການ ສກມຈ ໄດ້ນໍາສະເໜີຈຸດປະສົງ, ພາບລວມຜະລິດຕະພັນຂອງສະມາຊິກ ສມກຈ; ປະຫວັດ–ຄວາມເປັນມາ, ພາລະບົດບາດ, ໜ້າທີ່ຂອງ ສມກຈ ໂດຍມີວິໄສທັດເພື່ອໃຫ້ປະຊາຊົນລາວ ສ່ວນໃຫຍ່ໄດ້ເຂົ້າເຖິງ ແລະຊົມໃຊ້ຢ່າງຍຸຕິທໍາໃນການບໍລິການດ້ານການເງິນທີ່ມີປະສິດທິພາບ, ມີຄຸນນະພາບສູງ ແລະມີຄວາມຍືນຍົງແທດເໝາະກັບຄວາມຕ້ອງການຂອງເຂົາເຈົ້າໂດຍນໍາຜົນປະໂຫຍດໃຫ້ແກ່ທຸກຄົນປະກອບສ່ວນເຂົ້າໃນການຫຼຸດຜ່ອນຄວາມທຸກຍາກ.
ພ້ອມນີ້, ຍັງມີເປົ້າໃນການສະ ໜອງການບໍລິການໂດຍກົງແກ່ຜູ້ຈັດຕັ້ງປະຕິບັດວຽກງານການເງິນຈຸລະພາກ ແລະບັນດາລູກຄ້າຂອງພວກເຂົາເຈົ້າ; ເປັນຜູ້ປະສານງານກັບຄູ່ຮ່ວມງານຕ່າງໆ ແລະເຜີຍແຜ່ຂໍ້ມູນຂ່າວສານ–ຜົນການ ຄົ້ນຄວ້າ; ສົ່ງເສີມໃຫ້ມີສະພາບແວດລ້ອມທີ່ເອື້ອອໍານວຍ,ຂະຫຍາຍການບໍລິການໄປຫາພາກສ່ວນທີ່ໃຫ້ບໍລິການໆເງິນຈຸລະພາກເຊັ່ນ: ທະນາຄານບ້ານ/ກອງທຶນບ້ານ; ມີການປະສານງານກັບພາກລັດ, ອົງການມະຫາຊົນ, ຂະແໜງກ່ຽວຂ້ອງຢູ່ສູນກາງ ແລະທ້ອງຖິ່ນ.
ການສໍາມະນາຄັ້ງນີ້; ຍັງໄດ້ປຶກສາຫາລື ແລະແລກປ່ຽນການຂະຫຍາຍ ແລະການສົ່ງເສີມຕະຫຼາດຂອງສະມາຊິກເພື່ອໃຫ້ MSMEs ເຂົ້າເຖິງບໍລິການຫຼາຍຂຶ້ນ; ນໍາສະເໜີວິທີການໃນການປຶກສາຫາລື; ຈາກນັ້ນ,ກໍ່ໄດ້ນໍາສະເໜີການເຂົ້າເຖິງແຫຼ່ງທຶນຂອງ ສກຈຮ ເອກພັດທະນາ; ສກຈຮ ເພື່ອການພັດທະນາແມ່ຍິງ ແລະຄອບຄົວ; ສກຈຮ ຈໍາປາສັກ ຈໍາກັດ; ສສງ ເຊໂນ ແລະ ສສງ ມິດຕະພາບ ແລະ ໂອກາດດັງກ່າວຍັງມີຂໍ້ສົນໃຈ ແລະ ຕອບຄໍາຊັກຖາມຈາກຜູ້ເຂົ້າຮ່ວມທັງນີ້ກໍ່ເພື່ອເຮັດໃຫ້ຜູ້ປະກອບການ ຫຼື ຜູ້ຕ້ອງການແຫຼ່ງທຶນສາມາດເຂົ້າເຖິງແຫຼ່ງທຶນສະດວກ ແລະ ງ່າຍດາຍ.
ຊຶ່ງປະຈຸບັນບັນຫາແຫຼ່ງທຶນພວມເປັນທີ່ສົນໃຈຂອງສັງຄົມໂດຍສະເພາະໃນໄລຍະທີ່ມີການລະບາດຂອງພະຍາດໂຄວິດ-19 ເຮັດໃຫ້ປະຊາຊົນກໍ່ຄືບັນດາຜູ້ປະກອບການໃນພາກບໍລິການ MSMEs, ການຜະລິດກະສິກໍາ…ມີຄວາມຕ້ອງການຫຼາຍ; ສະນັ້ນ,ລັດຖະບານກໍ່ຄືທະນາຄານແຫ່ງ ສປປ ລາວ,ກອງທຶນສົ່ງເສີມວິສາຫະກິດ SME ແລະພາກສ່ວນກ່ຽວຂ້ອງຈຶ່ງໄດ້ມີຄວາມພະຍາຍາມເພື່ອໃຫ້ສັງຄົມໄດ້ເຂົ້າເຖິງແຫຼ່ງທຶນດອກເບ້ຍຕໍ່າ, ໄລຍະຍາວດ້ວຍຫຼາຍຮູບການໂດຍສະເພາະໃນໂຄງການສົ່ງເສີມສິນເຊື່ອແກ້ໄຂຜົນກະທົບພະຍາດດັ່ງກ່າວ ແລະສະຖາບັນການການເງິນ ແຫ່ງໃນທົ່ວປະເທດກໍ່ໄດ້ໃຫ້ການບໍລິການລູກຄ້າດ້ວຍດີຕະຫຼອດມາ.
